Santa Cristina de L.lena:
(II)
Torna asturiana fecha polos alumnos:
Manuel Abal Rubio, Guillermo Álvarez Fernández,
Fabio Zapico González, Tamara Álvarez Álvarez,
Diego Delgado Álvarez, Sara Gutiérrez Muñiz y Alba López Martínez.
Profesora: Sofía González Lázaro.
Muncho enantes de la "capiel.la" d'agora .
• Sabío ye que Santa Cristina de L.lena ye otru de los edificios atribuyíos al rei Ramiro I: pequeñu monumentu d'una sola nave colos anexos que-y dan la so forma en cruz. Foi declará Patrimoniu Mundial de la Humanidá pe la UNESCO, n'avientu de 1985.
• Un representante, por tanto, del arte prerrománicu asturianu, xunto a Santa María del Naranco, San Xulián de los Praos, El Conventín de Valdedios ..., y otros distribuyíos pela rexón (abonda bibliografía nos manuales d'historia y arte).
• Pero dalgunos detalles escápense o son descuidaos polos manuales más trillaos. Por exemplu, el mesmu allugamientu de la pequeña construcción, más conocía como capiel.la d'agora.
• Una serie de detalles nel edificiu enclina a pensar que´l allugamientu orixinariu foi otru, bien diferente y anterior a la dómina medieval. La capiella ta empericotada enriba un sucu que coneuta con otra serie d'asentamientos denantes: Corros (enriba Corneyana), El Corraón (enriba Felgueras), El Curuchu, Los Castiel.los (enriba La Vega´l Ciegu)
• Y una cosa más circula oralmente ente los vecinos d´estos pueblos: que l´edificiu de la ermita tien 365 esquines, tantes como díes l'añu -maticen allegraos nuna conversación-. De xuru non ye cuestión de contales.
• El datu tien qu'asentase na impresión que produz la cantidá de d'aristes na estructura del monumentu (contrafuertes, columnes, anexos, buliellos, ventanes, pequeñu soportal). La verdá ye que la ermita da la impresión de tener munches esquines: tamién tien so arte´l detalle.
Un al.lugamientu estratéxicu, por tanto .
• Destaca l'emplazamientu de la ermita, l.levantáu nun rel.lanu saliente enriba la cuenca del ríu L.lena. Esta ermita coneuta en cadena con toa una serie de l.lugares y topónimos significativos n'estratexes paecíes: Castiel.lo, El Picu Corros, Pendrá, Carabanés ...
• Dende'l pedregal al.lombáu de la l.lamada capiel.la, de forma direuta o indireuta, contrólase tol cauce del ríu L.lena, parte del Güerna, cumbres de Carabanés y Carraceo, parte de La Carisa ( vía romana )... Una bona parte del conceyu.
• Habría qu'añadir la coincidencia, tampoco casual sin dulda, ente La Cobertoria xunto a Santa Cristina y La Cobertoria xunto al Aramo, con dalgunos túmulos y dólmenes ya investigaos en dómines sucesives: una Cobertoria no cimero'l monte, ente les caleyes del val.le. Toa una rede de conexiones pa la vixilancia estratéxica d'un entornu montañosu, dalgunos milenios atrás.
• Esa estudiada reutilización estratéxica del al.lugamientu inmemorial de la ermita nun s'interrumpió nin cola última guerra "incivil" que nun tuvo reparu (nin escrúpulos) dalgún en sitiar el.lí los sos parapetos de control sol mesmu val.le nel que se xunten tantes caleyes de los altos: lo de Mamorana, La Vega'l Rei o La Vega'l Ciegu peles riberes del L.lena. los efeutos de les bombes tamién son visibles tres la reconstrucción y tipos de piedra diferentes emplegaos.
• La xuntura de la capiel.la d'agora con cultures y al.lugamientos prerromanos paez claro nun detalle: les dos columnines centrales de la ventana que mira al este, a mou de pequeños capiteles, rematen con un par de curuxes (eso paecen) orientaos al Dolmen de Carabanés (el dolmen bien conserváu tovía al pasu de La Vía Romana de La Carisa, per El Padrún y Espinas). Dambes posibles curuxes, tan fromaos so un material marmoleru, mate ensin pulir y más bien blancu, que contrasta col tipu piedra escura , balda y porosa ( piedra grenu y toba ) nel restu l'edificiu.
• En tou casu, dambes curuxes de Santa Cristina de L.lena (observación de los vecinos), en dambes columnines, nun proceden de la mesma dómina, nin de la mesma edificación que'l restu de la capiel.la (enantes palacete).
• Dalgún monumentu presistene (tal vez paganu nel so orixe) tuvo que llevantase ellí con anterioridá. La parexa de curuxes son símbolos totémicos mortuorios en varies cultures paganes prerromanes, y la mesma celosía interior de mármol, con fecha de 643, interprétase como mortuoria tamién.
• D'otru l.lau, ye sabío que Santa Cristina como santa y como imaxe nun tien arraigu popular nel tiempu: según los l.lugareños, la imaxe de santa fue trayía del agora despobláu de Santa Cristina de Xomezán (pueblu güei ensin capiel.la nin vecinos nos altos del Güerna, baxo la Pena la Portiel.la). Según esa voz popular, la imaxe pasó a Santa Cristina de Palacio cuando desapaeció la capiel.la de Santa Cristina del Güerna. Nun ostante, estos datos nun se confírmen ente tolos mayores destos val.les.
• Otros mitos y l.leendes arrodien la campa d'agora del monumentu prerromanu. Por exemplu, la pita y los güevos d'oro que se diz apaecíen en ciertes feches a lo l.largo del añu; o' l tesoru que munches vegaes buscóse a través de la gruta que s'abre baxo´l cuetu; o les tumbes colos güesos xigantes que s'atoparon tantes vegaes al facer afondamientos pa determinaes faenes del campu nes finques l.limítrofes...
• Remata les l.leendes de la ermita la que fala del santoral, reconstruyida ente varies vecines vieyes nestos val.les en torno a Palacio: qu'una xoven dicidiera facese monxa; so pa, paganu, opúsose airosu a esta decisión cola amenaza de quemala viva nun recipiente d'aceite; como la fía nun cambiara d'opinión, so pa decidió l.levar al cabu l'amenaza. Pero la xoven permanecía intauta al fueu y al aceite: la xoven nun quemaba. Al final el pa martilizóla a golpes. Y xurdió la santa. Sigue la l.leenda perdesdibuxada na zona.
• En resumen, el monumentu de Santa Cristina d'agora, alaxa del arte ramirense prerrománu, considérase de gran valir, a xulgar polos visitantes que cada añu pasen per estos val.les l.lenenses.
• Va poco, xurdió la polémica so si se debe (si convién o non) al.lumar l'entornu de la capiel.la, teniendo en cuenta'l deterioru que pue causar una inadecuada instalación al marxe de les normes vixentes pa esti tipu de monumentos hestóricos; y de los agravios comparativos que pue motivar respeuto a los propietarios de les finques , a los que nun se permite tipo de modificación dalguna por causas normatives subsidiaries.
Versión finlandesa (IV)
Versión francesa (III)
Volver a índice alfabético de contenidos
Volver al menú