EL QUEMPU,
El Campu
(Tuíza)
Torna asturiana: Ástor López Riestra.
EL Qempu ye un tsugar de la parroquia de Tuíza (Tsena), nel camín viiyu ente Tuíza Baxo y el desaparecíu monasteriu d'Acebos: güei tien una pista asfaltá desde Tuíza Baxo. Tá a 28 kms de la capital municipal, y tá a 1.100 ms de altitud. El tsugar tsegó a tener 82 paisanos y paisanas censaos.
El pueblu del Quempu (El Campu pa la mayoría güei) ye un conxuntu rural bien conserváu, que se tsevantó nun entornu apacible na vagüá que xube a los puertos del Alto´l Palu y Pena Tolóbriga, ente la Mesa y Las Rubias. Las casas espárcense a lo chargo del camín francés que baxa d'Acebos pol Antreigo, El Barreo, El Prau la Vieya...; y sigue pol camín viiyu, L' Envaralao, La Puenti´l Quempu, La Fiesta´l Bayo, La Belguería, Rospaso, La Cruz, Reconcos...
Y así cola el camín a Xomezana, Sotiecho... y perende abaxo hacia Mieres del Camín. Na toponimia tsariega asoman las fincas de Las Viñuelas, sin dulda cultivu de las viñas na cercanía del conxuntu monacal de La Virxen de Acebos, dediquéu a la atención de los peregrinos pol camín francés.
Y destacaban Las Tsinariegas, fincas baxo´l Monastiriu tamién, onde cultivaban la planta del lino (el tsinu, nestos pueblos); o asoman las cimas de la Magrera: alto sobre Les Navariegues, onde se estrayeron minerales de fierro hasta fai pocos años, y magro roxo pa facer el tinte con destinu a los teñíos (maera, llana...).
Finalmente, famosos fueron en tol conceyu Tsena y al otru tseu de las Ubiñas, nos pueblos leoneses, los madreñeros del Quempu, que bien aprendieron l'oficiu la maera ente los fayeros del Monte'l Blime y Las Navariegas: atsí vendian munchos pares de madreñas nas ferias de Babia y Las Omañas (San Pedro, Barrios de Luna, San Emiliano, Huergas...), colo que desarrollaban la so pequena industria familiar complementaria de aquetsa economía doméstica agrícola familiar.
Añadían los madreñeros nel mesmu viaxe preseos de maera pa la venta artesanal: xugos, paxos, timones, caidones, banastras, maniegos, xardones... Etso indica, asemesmo, las buenas relaciones que siempre hubo ente los pueblos lenenses de las Tuizas colos pueblos leoneses al utru tseu de las Ubiñas.
Güei, El Quempu, sigue animéu per duros ganaeros como Xose Manuel y familia, que aguantan l'iviernu hasta con bonas nevás. A etsos y a etsas (muncho trabayan dalgunas muyeres nos pueblos) debemos la cultura de estos tsugares a la falda las peñas. Un homenaxe bien merecíu se tenían estos paisanos y paisanas, como tantos y tantas asturianas pe los pueblos de montaña.
Para más información,
ver
Diccionario Geográfico de Asturias,
Ciudades, villas y pueblos.
Editorial Prensa Asturiana.
Colaboración de Julio Concepción Suárez.
Ver los trabayos de
Quico y Maruja
Foto: La Mesa, La Magrera, Pena Tolóbriga (Pena Tolondra)...