. Como el furmientu y el pan... Acto tercero (faltan los dos primeros, 27 páxinas, por lo que se deduce) Fragmentos de una pequeña obra teatral, que, muy deteriorada, se encontró en un caxón de recuerdos en Irías (Lena), por Xulio Concepción Suárez . Faltan las primeras hojas, no aparece el título ni el autor, no se llega al final... Se recoge especialmente, por su interés lingüístico y etnográfico: el habla y el sentimiento popular de las caleyas.
Manuela	(Llamando) ¡Pepa!
Pepa	(saliendo de la izquierda) ¿Qué?
Manuela	¿Quies dame un poco de furmientu?
Pepa	¿Entós?
Manuela	Nun sé ónde lo metió mió má: toy fartuca de buscalo...
Pepa	Sí, muyer (Entra en la izquierda y al poco rato sale con un pequeño envoltorio). Ten, nun vayas a perder de facer bon pan...
Manuela	Ya, en faltando el furmientu, fastidóse too.
Pepa	¿Daste cuenta que too ye igual? Nun hay pan sin furmientu, nin furmientu sin pan.
Manuela	Too nun ye igual, ¡oh!
Pepa	Hay munches coses que nun puen dir soles.
Manuela	¡Alabao! Ta nun sé qué quies dicer.
Pepa	Que hay munches coses que nun puen dir soles, como el furmientu y el pan, los homes y les muyeres...
Manuela	¡Si serás condená!
Pepa	Ya vas pa vieya, Manuela, y soltera nun faes ná.
Manuela	Toy bien ansina.
Pepa	Nun fagas casu, como tar casá nun hay ná; nun ye que se viva na gloria, porque a mí, bien sabe Dios que hay veces que m'apitez afogar al mió Quicón, pero tan siquiera, ta una acaompañá; la soledá ye mala compañera.
Manuela	Ta fecho asina, ta fecho...
Pepa	Primero nes quisiste, y agora nun hay remediu.
Manuela	Si hubié querío, ta nun yera tarde...
Pepa	¿Entós?
Manuela	Acercóseme Serafu dalguna vez, pero yo nun quisi...
Pepa	¡Muyer! ¿Cómo fosti tan boba? Nun lu teníes que haber dexao marchar.
Manuela	A veces, pésame algo, nun creas.
Pepa	Como si ná; ya pues rezai pel alma; va munchu tiempu que tira pa Xixón. Y eso que torres más altes se vieron cayer; si punsieras arte, entavía podíes facer algo.
Manuela	Nun voy andar espepitá a estes altures; dimpués de vieya, gaitera.
Pepa	¿Eso, qué tien que ver?
Manuela	Ná, ná, acabóse'l cuintu.
Pepa	Pues, yo, lo que tú, facía algo.
Manuela	Nun merez la pena; basta que te arremangues una vez pa que..., ya sabes. Non...
Pepa	Nun digas que te pesa, porque si fuere verdá, nun te quedabes asina como pan moyao.
Manuela	Si él me golviera a dicer algo, nun y-dicía que non; pero, ¿andar yo tres dél? Tenía que tar rematá.
Pepa	Ta visto que nun vales pa ná. Si fuera yo, ya te diría ónde se casaba Serafu. Él que ye tan asina..., nun hay más que tascáse-y un poco pa facelu dudar. Y tando en buena posición como tú, nun diba a costate gran trabayu. Si la otra nun debe tener ónde cayese muerta.
Manuela	El demonio y tú sois una mesma persona: vas a conseguir que pierda'l xuiciu.
Pepa	Non, mal rayu...
Manuela	Voime, Pepa.
Pepa	Aspera un pocu.
Manuela	Non, que voy tener que encender el llar otra vez.
Pepa	Merez la pena.
Manuela	Ya que por to culpa perdí tantu tiempu, ¿quies mirame a ver si ta bastante roxáu?
Pepa	Sí, ¡oh!
	(Vanse las dos por la derecha. Entran por el mismo lado Tomás y Rosina)
Tomás	Cariñín, ¿nun t'acuerdes de que fay un añu que andamos xuntos? Fue por esti mismo tiempu.
Rosina	¿Nun voy acordame?
Tomás	¿Y acuérdeste tamién cuando fui contigo por primera vez a llevar les vaques a La Iría? ¡Qué coloraína dibes! Nun te atrevíes a falar ná, nin queríes que fuera al lau tuyu, teníes que llevar al pirru en medio...
Rosina	Ya, debía ser medio tonta. Yo creo que siempre fui un pocu.
Tomás	¿Por qué dices eso? Que yo sepa tú nun tienes un pelu de tonta.
Rosina	Non, nun ye que sea precisamente tonta; ye que nun soy como les otres.
Tomás	¡Bah!, nun te compares a les otres, que non hay denguna que te iguale.
Rosina	¿Sabes a qué tengo mieo, Tomás?
Tomás	Qué sé yo, a cualquier tontería.
Rosina	Sí, debe ser una tontería.
Tomás	Esplícate.
Rosina	Verás, ye que yo..., ¿Tú nun me ves demasiao neña?
Tomás	Yo véote joven, pero neña, non.
Rosina	Vas a llegar a conoceme tanto, que pue que nesi momentu nun te guste, y entonces dexaré de ser una sensación pa ti.
Tomás	¡Tú qué dices, cariñín! Tú pa mí serás siempre la meyor moza, la más salá, nun dexaré un solu día de querete, y pa mí serás sensación mientras vivas. ¿Nun se alcuentren a una persona capes nueves a ca pasu? Pues yo a ti, ca día te alcuentro algo nuevo que me llena más ca vez...
Rosina	¿Por qué m'empezaste a querer, Tomás?
Tomás	Porque yeres única, porque desde guaje, siendo tú una mocosa, empecé a distinguite ya. ¡Yeras tan guapina! Y to la vida, cuando suañaba con tener moza, yera en ti en quien pensaba; cuando na cama abrazaba y besaba l'almuá, yera a ti a quien besaba. Dimpués creciste, y cuando pasabes al mio lau, poníame hasta nerviosu, y daba la güelta pa mirate. Por eso empecé a querete agora. ¿Crees que podré olvidate?
Rosina	Non, Tomás.
Tomás	Cielo mío, nun te atormentes pensando eses coses...
Rosina	Non, nes pensaré más. (Se recuesta sobre el hombro de Tomás, quien la abraza e intenta darle un beso, pero en aquel crítico momento entra Pepa y se separan).
Pepa	¡Hay que ver, hay que ver, les coses que pasen nesti mundu! Si nun ye pa reíse, que'l diablu me lleve... Ah, tábeis ahí, nun vos había visto. ¿Sabéis lo que pasó, mejor dicho, lo que se diz pel pueblu?
Rosina	¿Qué se diz, ma?
Pepa	Muyer, qué va ser, que Salustia va casase.
Tomás	¡Nun fastidie!
Rosina	¿Sí? Con quién, ¡oh!
Pepa	Con Félis el de Carna, el tuntu isi, que meyor taba de dolor de tripes, que cargar con Salustia. Non, si ya dicía yo que tardaba en pescar, porque toes eses siempre alcuentren dalgún tapaera.
Rosina	¡Qué tosquilón!
Tomás	Ta me cuesta trabayu creelo.
Pepa	Pues nun te cueste, que aseguráronmelo a mí; y, a más, últimamente atrapáronlos xuntos dalguna vez. Así que el tuntu isi gustó-y cómo trabaya Salustia, y agora cásase con ella. Non, si yo siempre dixi que los homes sois tontos...
Tomás	Ísi ye por demás, porque vamos... ¿Sabe usté lo que facía, tía Pepa?
Pepa	¡Qué faría esi pazguatu!
Tomás	Pues espiar a Salustia cuando andaba con unos y con otros, y luego cuntábamoslo con una juerga de mieo. ¡Y agora que cargue con ella! Tien que ser más que tuntu.
Pepa	Rewcoño, dalgunes muyeres qué puerques son, pero dalgunos homes qué palos merecíen. Ná, como los perros, que en cuanto ven una perra, acabóse-yos lladrar.
Rosina	¡Qué pena me da de Felis, la vida que va llevar con esa pécora, y to dirá bien, si dimpués de casá nun y-las-arma...
Pepa	Prubín, ¿tú cres que nun va ser ná cornúu? Ya verás: ¡asina de grandes!. Si la que meles mañes tien, tarde o nunca se y-quiten.
Tomás	Eso sí que ye verdá. (Suena una campanada)
Pepa	¡Dios, qué tarde debe ser! Fíos, dime nun menutu po les vaques, que va facéseme tarde pa catar.
Tomás	Sí, vamos, Rosina. (Salen por la derecha).
Pepa	(Monologando) Tengo tabía el piensu sin preparar y les gallines sin ciarrar. (Desgrana unas panojas de maíz y sale por la derecha).
Quico	(Entra por la derecha hablando solo). Hay que ver, hay que ver, si ya tardaba muncho en cayer, y por fin, cayó. ¡Probes guajes pequeños, qué vida van a llevar! Ya el grande, ési, ná. Casaráse con la mio Rosina, y arregláu. (Entra Pepa por la derecha).
Pepa	¿Qué estás marmurando, oh?
Quico	¿Ta nun sabes la noticia?
Pepa	Sí, ¡oh! Que esi mazcayu de Félis cásase con Salustia.
Quico	Sí, eso dicen pel pueblu tamién. Pero, non, hay otra cosa.
Pepa	¡Demonio, qué habrá pasao! Y yo sin enterame.
Quico	Pues que Serafu va casase.
Pepa	¡Nun fastidies!
Quico	Sin fastidiate.
Pepa	Con esa zurripuerca que andaba tras dél.
Quico	Con la mesma.
Pepa	¡Alabao, alabao, qué diañu y-habrá entrao a Serafu pa decidise desa manera!!
Quico	¿Qué te paez que será? (Hace un gesto alusivo al embarazo)
Pepa	¡Qué!
Quico	Como lo oyes.
Pepa	¡Probe Ramona! Si llevantara la cabeza y viera al so homón, sé yo que golvía a morrer del sustu. Por eso, estos homones pasen mejor en sin comer que en sin muyer... Probes guajes, qué pena me da dellos.
Quico	Pues, sí, dixéronmelo unos mozos, y dixéronme tamién que diben prepara-y una cencerrá pa mañana, pero de les sonaes.
Pepa	¡Ay, recoño!, esa cencerrá na pierdo yo, y pienso d'echa-y unes bones cuartetes, eso sí, ¡qué bien! ¡Bomba! ¡Siga! (Gritando)
	Ési que y-llamen Serafu, que se dedica a facer gaites, failes con maera pochiscu y róbala pe les mates.
Quico	¡Muy bien, muyer! Hay que apuntalo pa que nun se mos olvide.
Pepa	Tol tiempu que media hasta mañana tengo pasalu discurriendo-y cuartetes a esi mosquilón. ¡Mira que casase! ¡Qué falta y-faría teniéndolo too. Non, si digo yo siempre que el que males mañes tien, tarde o nunca se y-quiten, y ye verdá. Pero, anda que ésta nun va ser tan bobina como Ramona, ya verás como a vaca corniaora nunca y-faltaron cornaes.
Quico	Serafu casarase, pero paez que detrás va facelo Tomás; nun y-veo yo conformidá pa aguantar una marcolfa.
Pepa	Güeno, pa nosotros cuanto primero casemos al a fía, meyor. Ya me ta a mí faciendo carga tanto cortexar.
Quico	Sí, sí, la fía hay que casala pronto: na quio yo ver per ahí de mala manera.
Pepa	Pues, ya verás: meyor ocasión que agora na vamos a encontar.
Quico	Tú fay toos los posibles, pa eso yes muyer.
Pepa	Desde'l primer día que toi dándo-y a Tomás toes les facilidaes posibles pa que cargue con ella. (Suenan unas esquilas). Ahí vienen co les vaques. Anda Quico, vete atales y prepara pa catar. (Sale Quico por la puerta derecha, y casi al mismo tiempo entra Tomás por el mismo sitio).
Pepa	¡Ah!, ya llegastis.
Tomás	Sí, oh, ya tamos aquí. Bien creí que nun díbamos a llegar hoy.
Pepa	¿Entós?
Tomás	Escapósemos la xatuca más pequena y tuvi que dir corriendo tres della cuasi que hasta La Iría.
Pepa	¿Sí? ¡Qué mala, cuánto te fexo sudar!
Tomás	Y que lo diga. (Se sienta).
Pepa	¡Probe Tomás! Vaya lo que te fexo correr. Verás, voy sacate un xarru vino, y cun él un pocu xamón. Verás asina qué pronto te pasa la sudá.
Tomás	Non, nun se moleste, que nun ye ná.
Pepa	¡Cómo nun me voy a molestar per ti!; si fuere per otru; pero per ti, nun faltaría más. (Entra Rosina por la derecha). Rosina, saca-y a Tomás un poco de vino, y corta-y un poco de xamón que ta tou afogáu por correr tres la xata.
Rosina	Sí, ma.
Pepa	¡Qué airón más calentón fay!
Tomás	Ya, ye l'aire les castañes.
Rosina	Aquí tienes.
Tomás	Peru, muyer, ónde vas con too eso.
Rosina	Pa ti, tontín. (Le hace un guiño, besa la punta de sus dedos, y se los pasa delante de sus labios). Anda, cúmilo, pa que te pongas fuerte. (Pican a la puerta)
Pepa	¿Amira quién ye, Rosina?
Rosina	Home, ye usté, pase, pase.
Serafu	Muy güenes.
Pepa	Bonos güeyos te vean; paez que agora nun vienes tanto per aquí a vemos.
Serafu	¡Bah!, total ye igual viniendo'l mio fíu.
Rosina	Igual, non: muncho meyor.
Serafu	Vaya, fíu, paezme que te traten bien.
Tomás	Nun hay quexa.
Pepa	Siéntate un pocu, Serafu, y pincha algo con Tomás.
Serafu	Sí, voy pinchar un pocu, que a estes hores apitez.
Pepa	¿Qué te trai per aquí, Serafu?
Serafu	Ná, venía a ver a Quico, que va cuantayá nun lu veo.
Pepa	Pues tará catando, porque fay ratu que salió a la cuadra, y tenía allá les zapiques.
Quico	Voy acercame a velu y charrar un pocu. (Sale por la derecha).
Rosina	Sí, vaya que na cuadra ta.
Pepa	Caime un pocu rara esta visita de to padre, ¿a qué vendrá?
Tomás	¿Sabe que tamién a mí m'estraña un pocu? Fay unos díes que lu alcuentro algo cambiáu. Algo debe pasar a mio pa.
Pepa	Si nun-y pasa, ya y-pasará.
Tomás	¿Usté sabe algo?
Pepa	Yo, saber, ná. Digo que si agora nun y-ta pasando ná, que algo verá venir que lu trai preocupáu.
Tomás	Sí, eso ye verdá. Tú ya yes grande bastante pa decidir y saber lo que te convién.
Tomás	¡Home, claro!
Rosina	¿Quies que te saque más vino, Tomás?
Tomás	¿Qita pallá, muyer; ¿tú quies que m'emborrache?
Pepa	Nun será tanto, ¡oh!
Rosina	Home, sí, ye tantu vino que podíes emborrachate. Voy sacate otro poco...
Tomás	Non, Rosina, nun quiero más, de verdá.
Rosina	Güeno, nin, como tú quieras. (Entran Serafu y Quico, que lleva una zapica)
Pepa	¿Ya cataste, Quio?
Quico	Sí, ta ta catao.
Pepa	¿Baxárontelo bien?
Quico	Bastante bien.
Tomás	No sé: tú nun tienes ná bona mano.
Quico	Pepa, Serafu vieno a vemos pa tratar con nosotros de un asuntu, ¿sabes? Y queríamos falar un pocu cuntigo. (A Tomás y Rosina). De manera que podéis salir a dar una güelta, y de pasu, tú écha-y un pocu niarbasu a les vaques, mientres que Tomás saca un pocu cuchu.
Tomás	agora mesmo. (Se van él y Rosina).
Pepa	¿Qué querrán estos homones?
Serafu	Ye que toy nun aprietu, y como vamos ser consuegros, pues atrévome aquí meyor que a otros a la hora de pedir un favor...
Pepa	Nosotros per ti facemos lo que pudiamos; non per ti, pel rapaz; ¡ye tan bunu! Y porque aspero que ya tarde pocu en decidise, que si no, yera de pensar...
Quico	Ahí tas bien, muyer.
Serafu	Dígovos yo que podéis tar seguros del mió Tomasón: nun tarda'n cayer nin mediu añu.
Pepa	Como nun seya primeru..., nun sé. ¿Qué favor queríes, Serafu?
Serafu	Ná, ye poca cosa..., ye que, veréis..., toy asina comu nun aprietu, y necesitaba, claro, unes perres...
Pepa	Comu cuántes.
Quico	Mil pesetes.
Pepa	¡Mal rayu t'esfueye, Serafu!: cuatromil riales ná más... Y too por esa llagartona... ¿Condenaos los dos! Ya pues preparate que mañana van chate una bona cencerrá. Fíxate que yo mesma, yo, pienso dir y dicételes gordes, por tuntu. ¡Amira que casase!
Serafu	¡Nun me fastidies! ¿Una cencerrá a mí? ¡Condenaos! Lo que me faltaba. Fixisti muy bien en avisame, que mañana voyme dormir al caburnu.
Quico	Tú, muyer, llengua trapu pel estilo en mio vida la vi. agora estropiástemos la fiesta.
Pepa	¡Ye verdá!
Serafu	Dexaivos de monsergues, y vamos falar formal. ¿Pueo o non, cuntar co les mil pesetes?
Pepa	Prestarételes, pero cun una condición.
Serafu	Condiciones, les que quieras.
Pepa	La condición ye que m'asegures que'l to Tomás cásase antes de los seis meses.
Serafu	¿Sí? Entós, pués prestame les perres, porque d'eso toi yo tan seguru como que hoy ye xueves.
Quico	Nun veo yo que tes tan seguru, Serafu.
Serafu	Sí, Quico, sí, dígote yo que sí; pero ¿por qué díbais a desconfiar?
Quico	Pues porque hoy non ye xueves, Serafu, ye vienres.
Serafu	¡Coño!, pues ye verdá, ja, ja, ja... Güeno, pal casu, ye igual.
Pepa	Fíxate, Serafu, no que dices, porque como pase como con los díes, sácote les tripes y el corazón.
Serafu	Güeno, Pepa, güeno, ya verás cómo ye verdá, muyer.
Pepa	Nun sé..., muncho nun hay de qué fiase. Voy buscate les perres. (Sale por la izquierda).
Quico	Esta muyer mía ye lista como una ardilla; ¿nun te fixes?
Serafu	Sí, ¡oh!, home, nun hay otra muyer na comarca como ella; bien lo dicía l'otru día D. Celestino el Cura: ésta ve les yerbes nacer.
Quico	Sí, sí, ye verdá. (Entra Pepa por la misma puerta por donde salió).
Pepa	(Dándole el dinero). Si eses perres son pa casate, alcuérdate d'elles en plena lluna de miel, nun vaya ser que se t'olvide degolveles.
Serafu	¡Vaya!, esta Pepa, como siempre.
Pepa	Sí, tómalo a guasa, que tengo mieo que desque morrió Ramona, andes per ahí empufáu...
Serafu	Nun tengas cudiáu, que les coses marchen bien.
Quico	Ven, Serafu, vamos moyar el gargüelu.
Serafu	Sí, que de tantu falar, téngulu un pocu ásperu. (Apártanse hacia la mesa).
Pepa	(Hablando al público). Esti homón, como toos los homones, en cuantes que y-os falta la muyer, nun saben más que andar per ahí tres d'eses fraxilones... Y el miu, igual, ahí onde lu veis medio mosca muerta. Si allego falta-y yo, ya veriéis qué moo d'espabilar... (Llaman a la puerta).
Pepa	¡Quién va!
Responden	El cobrador del Banco de Gijón.
Pepa	Pase, pase. ¿Qué ye lo que se y-ofrez? (Se acercan Quico y Serafu)
El cobrador	Pues venía a cobrarles a Uds. dos mil pesetas.
Pepa	¿Dos mil pesetas? Recoña, esto ye un timu. ¿Usté, con qué cara s'atreve a pedime a mí dos mil pesetes?
El cobrador	Con la cara d'esta letra firmada a un año vista.
Quico	Güeno, déxala aquí, que dimpués de tar viéndola un añu...
Pepa	Calla tú, Quico, déxame a mí entendeme con esti... fulanu. A ver, esplíqueme a mí tou esi negociu...
El cobrador	Muy bien, señora, se lo explicaré. Primero, ¿vive aquí Francisco Álvarez Ordóñez?
Pepa	El mesmu.
El cobrador	Pues, bien, este señor firmó aquí, véalo bien claro...
Pepa	Esa firma paezse a la del mió Quicón, pero nun creo que seya la dél.
Quico y Serafu	¡A ver!
El cobrador	Vamos, señora, no diga tonterías. Se ve bien claro que dice Francisco Álvarez.
Quico	Nun to yo cuenta d'haber firmao ná; a lo meyor sí, pero sería borrachu, d'otra manera...
Pepa	Eso ya ye otra cosa, ya me paicía a mí un pocu rara esa firma; alguien t'engañó tando borrachu; lo que yo dicía, un timu... Llárguese d'aquí inmediatamente, o meto-y la pala dientes pe la barriga; ¿nun y-da vergüenza aprovechase de la xente d'esa manera? Non, si lo que ye, el día que yo falte d'esta casa...
El cobrador	Señora, no me canse de aguantarla y escuche: esto no es un timo, porque el Banco de Gijón es una entidad muy seria. Yo tampoco soy un timador como para salir delante de una pala de dientes, como Ud. dice. Y por otra parte, líbrese de hacerlo, porque entonces voy en busca de la Guardia Civil, y las cosas cambiarían... Su marido de Ud. firmó como fiador hace un año por el Sr. Serafín Díaz Casariego en casa de D. Laudelino Fernández Rodríguez; y éste entregó dos mil pesetas a Serafín, quien se comprometió a devolver el dinero antes de un año. Al no efectuar la devolución, el Banco de Gijón cobra a su fiador D. Francisco por carecer D. Serafín de bienes a su nombre. ¿Se entera, señora?
Pepa	¡Ah, paisanu, Usté dexóme pará! ¿Ye verdá too esto, Serafu? (Fuera de sí).
Serafu	Ya cuasi que nun m'acordaba, pero paezme que ye verdá. agora mesmo voy ver a isi pirru de Lin pa canta-y les cuarenta per l'angatá que mos armó.
Quico	Al que y-l'armó bona foi a mí, non a ti.
Pepa	(A grandes voces). ¡Quitu, Serafu, nun te vaigas marchar agora, que entá hay muncho que falar. Y tú (a Quico), asquerusu, voy metete los puños pe la cara. ¿A qué diablos firmes tú ná, en sin preguntámelo a mí? A isti home voy terminar per pegá-y un tochazu, porque si non termina él comigo. ¡Qué meyor que s'hubiá matao él en llugar de la mió Galinda! ¡Cuánto mos hubiá aforrao! Y Usté, ¿qué fay que nun marcha ya? Nun tengo pansao paga-y...
El cobrador	Como Ud. diga, pero tenga en cuenta la señora que, si no paga, el Banco embargará, y se quedará con la mejor finca que tenga.
Pepa	¡Sanantonio, qué te fixi yo pa que asina te portes comigo! Pa qué nun mandes pal infiernu d'una vez al mió Quicón, a Serafu..., y a toos los del Bancu. (Entran Tomás y Rosina por la derecha).
Tomás	¿Qué pasa aquí?
Pepa	Amira, Tomás, quiérote pa la mió fía porque nun te paeces en ná al to padrón; yes igual que la probe Ramona, que en paz estéa; que si fuéras igual que él, agora mesmo salíes d'esta casa d'estampía, y pa nun golver más.
Tomás	Pero..., ¿qué foi lo que pasó?
Pepa	Ya lo sabrás. Agora, dir, sacai el guchu mayor de la corralá y llevailu an casa Rufo el tratante, y que vos lu pague nel actu, que tengo falta les perres; que y-lu-doy en lo mesmo que m'ofrezú l'utru día per él... (Vanse).
Quico	Amira, Pepa, yo...
Pepa	¡Cállame, Quico, o nun respondo de mí!.
El cobrador	Señora, la cosa no es como para ponerse así.
Pepa	Oiga usté, como se llame: a usté ná y-importa pa metese en ná. Voy a paga-y, y andando. Y si nun y-para esa risina que me saca, córtoila yo con una pala dientes. (Se oye'l gruñir de un cerdo).
Pepa	¡Ay, mió probe guchu, per ónde vas!, con la estima que yo te tenía, per algo te crié yo mesma en casa; quién diba pensar que mos díbamos a separar d'esta manera; ¿nun yera meyor que me llevaran al mió Quicón, aunque fora pa la cárcel?
Serafu	Pepa, nun te desgustes, que yo pienso de cumplir cun too.
Pepa	Nun me fales de cumplir, Serafu, que te conozo bien: a ti, hay que cobrate nel actu; asina que vete pensando cómo vas arreglate pa que la boda nun salga d'esti mes, y amira que sólu falten venti díes.
Serafu	Güeno, Pepa, si ési ye'l preciu que y-pones a la deuda, ya pués cuntar conel; pa mí ye muncho más fácil, y pa ti, va ser meyor.
Pepa	Ye l'únicu preciu que se pue poner, porque les perres, paezme a mí que ya les vi. Y tú, Quico, mírate bien, porque a la prósima nun te perdono: échote fuera casa pa siempre xamás y un día. (Entran Tomás y Rosina).
Rosina	. Ten, ma, tresmil doscientes pesetes.
Pepa	Esi bandidu aprovechóse de la oportunidá: rebaxó cincuenta pesetes del utru día a hoy; ¿ves tú lo que faes? con estes antroxaes, too sal asina. Tenga usté les dosmil pesetes y métales allí, en conserva.
El cobrador	Señora, suyo es el recibo, y quédense ustedes con Dios.
Pepa	¡Hala!, que y-dé l'aire... na pernera. (Se sienta). ¡Hay, Virxen de los Dolores! Vaya un marido más tuntu que me disti. ¿Visti, visti que azaría? Agora ya pués tar cuntintu. ¡Ay, qué calor m'entra! Toi poniéndome mala, danme unos escalientafríos pel rosariu....
Rosina	.¡Ah, ma! ¿Quier que y-vaya buscar un floritu y fágo-y-lu?
Pepa	Sí, fía: búscalu y failu. (A Quico). Tú, ven acá, ven comigo a l'habitación. (Sale Rosina por la derecha; Pepa y Quico, por la izquierda).
Serafu	Ven acá, fíu, tengo que falar un pocu contigo.
Tomás	¿Qué quier, pa?
Serafu	Tomás, les coses tán poniéndose al roxu, y tengo d'alvertite pa que nun muerdas nel anzuelu.
Tomás	¿Qué anzuelu, pa?
Serafu	Verás, déxame esplicate: como pués ver, tenemos una bona amistá con Quico y la muyer; claro que esta amistá ya l'había antes de que tú cortexaras a Rosina. Y yo, en sin dame cuenta cuasi, pues pedí-yos unos favores, y ellos, sobre too Pepa, fixéronmelos de muy bona gana. ¿Tú, por qué crees que me los fixeron de tan bona gana?
Tomás	Porque son muy bones persones.
Serafu	¡Quiá!, nun lo creas, nun seyas tuntu; fixéronmelos porque asperen que tú te cases pronto con Rosina.
Tomás	Sí, pué que seya per eso.
Serafu	Pues, per eso quería yo dicite que lo meyor pa ponelos cuntentos ye deci-yos que pienses casate enseguía; ellos quédense como unes pascues, y tú llárgueste pa Xixón pan casa to tíu, que ya sabes que nagua per llevate.
Tomás	Nun creo que yo y-faga esa xugá a Rosina.
Serafu	Sí, tontón, ¿qué necesidá tienes tú de casate tan lluéu?
Tomás	Escucha, pa: si nun tuviá ganes de casame con Rosina, fay tiempu que hubié marchao con mió tíu. ¡Pero tú sabes cómo yo quiero a Rosina!
Serafu	¡Tontón, yes un pipiolu, has de alcordate de lo que yo te digo!
Tomás	¡Ah, pa!, nun sé yo por qué me das esos conseyos, y nun te los apliques a ti mesmu, que ya me enteré yo per ahí que dibes casate enseguía.
Serafu	Yo soy diferente, Tomás, pueo facer lo que me vien en gana.
Tomás	¡Con que pués facer lo que te vien en gana, eh! Pues yo tamién lo pienso facer, y hoy mesmo dígo-y-lo a Rosina pa que mos casemos cuantiantes. ¿Cres tú que diba yo aguantar una marcolfa'n casa, usando too lo que yera de mió ma, faciendo burlla de mí, y pué que de ti tamién?
Serafu	¡Amira'l piuyu isti! Si se te mete nel rixu casate, failo; pero a mí nun me pidas denguna perra. Tan bonos los tiempos.
Tomás	Nun me faen falta, pa, ye les sacaré yo d'onde puea. ¿O cres que mió tíu nun me les dibe pretar. Ya lo creo que sí, con lo que me quexo él siempre.
Serafu	Eso ye lo que te salva.
Tomás	¿Yera too eso lo que queríes dicime?
Serafu	Sí, eso yera, pa qué más. Ya lo palparás.
Tomás	Yo bien voy, pa. Amira tú lo que faes, que otra como ma...
Serafu	Fay el favor, Tomás, nun me recuerdes coses penoses. Yo quixi date un bon conseyu y tú nun lu quies tomar. Allá tú. Que nunca te pese'l nun habeme escuchao, nin habeme fexo casu.
Tomás	Aspero que non. Tú arregla tus coses, que yo ya arreglaré les míes. (Entra Rosina). Rosína, Rosina, quería dicete algo, pero nun sé cómu emprecipiar.
Rosina	¡Ah, madre, con la facilidá de palabra que tienes tú, muncho m'estraña que nun aciertes.
Tomás	Sí, tengo muncha facilidá de palabra a veces..., pero agora toi tan emocionáu, que nun acierto.
Serafu	Si serás magüetu hasta pa eso. A lo meyor lo que quier dicete ye que piensa casase.
Rosina	.¿Qué?, ¿ye verdá eso?
Tomás	Sí, Rosina, ye verdá: quiero que mos casemos pronto, y ya que está aquí mió pa, quiero dicelo a to ma..., y a ver...
Rosina	.¡Ay!, nun sé qué me paez. Nun sé si poneme cuntenta o chame a llorar.
Serafu	(Simulando voz femenina). Podíes chate a llorar.
Rosina	.(Se abraza a Serafu llorando). ¡Ay!, tíu Serafu, creo que me voy golver lloca.
Serafu	¿De qué, de mieo?
Rosina	Voy corriendo a dicelo a mió ma (Sale por la izquierda).
Serafu	Tuntu, más que tuntu. Yo que creía que tenía un fíu llistu, y resulta que me sal medio mazcayu.
Tomás	(Compungido). Güeno, pa, ya ta bien; calla ya.
Serafu	Calla ya, y cun eso déxeslo arreglao; seguramente ya te ta pesando. Mira, fíu: si te pesa algo el pasu que acabes de dar, pue arreglase igual o meyor entavía que antes. Asina dexámoslos más cuntentos, y tú llárgueste mañana mesmo pa Xixón, y del dichu, nun hay ná.
Tomás	Si serás pirru y melu: nun m'estraña ná de la vida que y-fixisti llevar a mió ma, pero yo a Rosina nun y-pienso facer lo mesmo, ¿sabes? Nun pienso golveme atrás per ná del mundo; entérate, y pienso casame lo antes posible pa que rabies más.
Serafu	¡Rabiar yo! ¡Tas arregláu, nin! Como nun rabies tú con esa páxara que va cayete encima... (Salen Pepa, Quico y Rosina).
Pepa	¿Qué ye lo que acaba de diceme Rosina? ¿Ye verdá eso, Serafu?
Serafu	Al paicer...
Pepa	Ven que t'abrace, fiu del alma, pero vamos a ver, tú...
Tomás	Yo quería pedí la mano de Rosina hoy mesmo.
Pepa	Escucha, fíu, dame muncha pena casar a Rosina, pero como ye pa ti, que sé yo que yes un bon rapazu, y tires a la raza de to madre, que bien merez tar nel cielu, y como bien pensao, con la mano sola nun dibes facer gran cosa, dóitela antera.
Serafu	Pa lo que gustes.
Pepa	(Echando una mirada torva a Serafu). Si allegues a paicete al to padrón, nun te dexo nin acercate a ella.
Quico	Enhora buena, rapaz. (Estrecha la mano a Tomás, y luego a Serafu). Serafu, vamos ser consuegros.
Serafu	Aspero que mos seya p'algo de provechu.
Pepa	Hoy ye día grande pa toos y hay que celebralo. Quico, saca un poco de sidrina. Rosina, trai unes castañes. Y tú, Tomás, prepara'l tambor. (Se van todos).
Serafu	Ya ves, Pepa, yo cuando digo una palabra, cúmplola.
Pepa	Ya lo veo, ya: nun asperaba yo que fora tan depriesa.
Serafu	Non, si tomando yo les coses a pechu, ye difícil que nes consiga. Trabayu me costó, nun creas, pero el probe ve pe los güeyos de Rosina. Cuando yo y-dixi: basta ya de cortexos, o pirru dientro, o pirru fuera, púnxoseme tou amelindráu y díxome "entós, cásome con ella, porque yo quiérola". Y pensé yo pa mí: ya ta'l pan nel furnu.
Pepa	El to Tomasón ye muy bon rapaz, creo que van facer un bon matrimoniu.
Serafu	Eso garantízotelo yo, Pepa; si nun sabré yo a quién tengo en casa. El mió Tomás ye igual que pan moyao. Oye, y taba yo pensando que ya que se arreglaron tan bien les coses y tan de priesa, nun sé si seré pa soportalo.
Pepa	¡Cómo soportalo!
Serafu	Sí, muyer: ... esto... (hace gestos alusivos al dinero). Vas tener que prestame tamién eses mil pesetes que te sobraron del guchu.
Pepa	¡Ay, recoño! eso sí que non.
Serafu	Güeno, muyer, yo pienso degolvelo.
Pepa	Nin ná, ni nunca: nun te pongas, que goler nun güeles un perru más.
Serafu	Pero muyer, comprende que...
Pepa	Ca, ca, ca..., tá comprendío: esto ye una boda a preciu fiju.
Serafu	¡Qué condená yes, Pepa! Amira, que con lo que yo fixi per Rosina, y tú nun quies nin agraecelo.
Pepa	¡Ah, sí! agraecelo, muncho; pero perres (pasa el índice de la mano derecha por debajo de la nariz) nin media.
Serafu	Tú préstameles, y facemos un papel agora mesmo.
Pepa	Nun y-des güeltes, Serafu, que ye igual, si nun te conociera...
Serafu	Amira que pueo facer que se güelva atrás el mió Tomás.
Pepa	Covéncite que palabra y piedra suelta, nun tienen güelta; y, como'l rapaz se güelva a trás, ya pues dir rezando lo que sepas, porque afogar, afuégote. (Entra Quico con unas botellas de sidra, echa un culete para Serafu, después otro para Pepa, y, finalmente, para él).
Quico	Bebamos: hay que afogar los desgustos pa que nun quedin más que alegríes. (Canta).
	Estoy llocu d'alegría, pos voy casar la mio fía con un mocetón muy guapu que ye'l fíu Serafu.
Pepa	(Entran Rosina y Tomás). ¡¡Viva los novios!!
Quico y Serafu	¡¡Viva!!
Pepa	¿Ónde tan les castañes, oh?
Rosina	Taba ciarráu nel horro, ma.
Pepa	Ye verdá, nun m'alcordaba. (Saca la llave del bolsillo). Tomai y daivos priesa. (Salen Tomás y Rosina).
Quico	Faen bona parexa.
Serafu	Decía-y a Pepa que gracies que intervine yo, si non...
Quico	Si non, ¡qué...!
Serafu	Ná, nun tengas mieo: abultaba-y un pocu temprano.
Pepa	¡Serafu!, toi viéndote vinir. ¿Quies pegayla otra vez al mió tuntu...
Serafu	Home, Pepa...
Pepa	(A Quico). Isti tá nun ta fertu perres, tá quier más. Ya pues andate con güeyu y nun morder l'anzuelu, que si picar piques otra vez, róciote con gasolina y priéndote fuiu. Y a tí, tamién, Serafu. De mó que acabóse la cantinela de les perres.
Serafu	¿Creéis que pue obligase a un fíu a casase por esa miseria? Tú, Quico, di la verdá...
Quico	Yo, d'eses coses nun sé ná, Serafu: pregunta-y a ella.
Serafu	Tú, da una opinión.
Pepa	Ye de sobra, Serafu, nun t'emperres que ye tontería. Si sal tan trabayaor como tú, regaláu ye caru.
Serafu	Márchome, ta remordiéndome la concencia de lo que fixi: amira que vender mal vendíu a un fíu...
Pepa	Aspera, nin, ¿cuántes perres sacó to padre el día que te caseste tú? ¿Acasu cres que casar un fíu ye viendelu? Naide te mandó dir a parar con una que nun tien nin pa mandar cantar a un ciegu.
Serafu	¿Qué sabes tú?
Pepa	Paézmelo a mí...
Quico	Pues cosa que se y-figure a la mió Pepa, se nun ye verdá, falta-y pocu.
Serafu	Ye verdá..., y ¡qué! ¿Qué pueo facer yo?
Pepa	Podíes haber fécholo antes, candenéu: mientras que haiga una moza nel pueblu, hay que alcordar cun ella antes de salir fuera.
Serafu	¿Hay tanto en qué escoyer? Pa una que hay, dióme calabaces les que quexo.
Quico	¿Dices per Manuela?
Serafu	Per Manuela mesmo.
Pepa	Pues, anque te paezca que non, taba rabiando...
Serafu	Nun me tomes el pelo, Pepa...; eso ye querer saber demasiao.
Pepa	¡Asquerusu! Tavía nun fay un retu, tevo dicíndome ella que bona pena y-daba...
Serafu	¡Nun fastidies!
Pepa	En sin fastidiar.
Quico	Tá podíes dexar lo de Xixón y vinir pacá, pe lo menos ésta...
Pepa	Pe lo menos tien con qué mantenelu y fartucalu, que ye bastante.
Serafu	¡Coime! Cun esto nun cuntaba yo... Amira que..., si nun fora...
Quico	D'eso nun fagas casu, Serafu, pue que seya pa chate la uña. Agora debieras asperar.
Serafu	¿Cres que ye fácil? Cualquiera la baxa de la burra.
Pepa	Cuando tanto s'apura..., nun sé...
Serafu	¿Qué, Pepa, qué, dime! Too lo que digas tú tien más valor pa mí que si lo dixera l'alcalde.
Pepa	Cuando tanto s'apura, ye que nun ye verdá, y tien mieo que y-lo discubras.
Serafu	Hoy nun duermo pensándolo.
Pepa	Ya se sabe que nun te gusta trabayar gran cosa, pero ... merez la pena.
Quico	¿Trabayar? más con la otra que con Manuela; ésta, siquiera, ta acostumbrá.
Pepa	Sí, ye verdá, dame a mí que nun fexo más que servir emu.
Serafu	Dexaisme paráu: si allego yo a saber que Manuele me fay casu...
Pepa	¿Qué asperabes, que fora ella a to casa a dicételo?
Serafu	¡Muyer! ¿Cómo diba pensar yo ná, tando viudu?
Tomás	Pa que veas que nun ye ná fácil entender a una muyer.
Quico	Serafu, llega unu a vieyu y tánun sabe cun quién trata.
Pepa	¡Disgraciéu, qué vas saber tú si tul mundo fay lo que quier de ti!
Quico	¿Tanto meto la pata, ¡oh!, pa que te pongas asina?
Pepa	Si nun fora per mí, nun sé lo que habría sío de ti.
Serafu	Caún con la suya: yo nun paro de pensar en Manuela.
Quico	¡Si lo tienes fácil d'arreglar.
Serafu	Paéztelo a ti.
Quico	Nun tienes más que ponete malu una temporá.
Pepa	Entavía ye meyor otra cosa.
Serafu	¿El qué, Pepa?
Pepa	Pones un par de tables de caxón nuna pata, y arrodiámoste nella media sábana, y como si la rompisti. Asina, viéndote'l pueblu, naide pue dicer ná. D'esa manera, allargues la boda hasta onde te dé la gana. Lluéu, si resulta que nun hay ná, ya ta arreglao..
Serafu	¿Sábeste que nun ye del too mala idea?
Quico	La mió Pepa ye referveora, pero ¡eh!, a llista nun hay quien la gane.
Pepa	(A Quico). Si allego a ser tan llista como tú, tamos arreglaos, fíu del alma
Serafu	Oye ¿y les muletes?
Pepa	Tá conservamos les últimes que gastó mió suigru que en paz estea.
Quico	¿Nun t'alcuerdes que a mió pa faltába-y una pata?
Serafu	¡Ye verdá!. Entóncenes, manos a la obra.
Pepa	Nun se fale más, ya que vas ser consuigru... (fuera se oye una voz llamando a Pepa).
Voz	¡¡Pepa!!...
Pepa	¿Quién será?, voy a ver. (Sale Pepa)
Serafu	La to muyer val lo que pesa. Ye un pocu rescamplá, pero eso nuy y-quita'l méritu.
Quico	Dígotelo yo que val lo que pesa. Apuesto que foi ella la que convenzú a Manuela, sinon, de qué, ¡oh!. Qurete Manuela a ti... Mira que tien d'esto muncho... (hace gestos relativos al dinero).
Serafu	Tal como toi yo, nun pueo suañar con ná d'eso, tengo que valeme con lo que yo tengo.
Quico	Paezme que te vales meyor con lo que tienen los demás...
Serafu	Too se y-allega a unu. ¿Si supieres que con doscientes pesetes más me arreglaba? ¿Nun tendrás algo per ahí?
	(acabóse'l testu de las fueyas encontrás, pero poco más fai falta: el final veise venir, claro...)

Otra bibliografía de Lena

Volver a Esquisa literaria y creatividad

Índice alfabético de contenidos