Costumbres, tradición, gastronomía, trabajos rurales, vida vaqueira, saber popular

TRABAYU EN GRUPOS Y ESPOSICIÓN ORAL,
por Vanesa Fabián
(na clase d'Asturianu)

    1. Escueye un tema del to entornu inmediatu, un tema que domines y del que tengas algo que dicir (los tos conocimientos, gustos, l’entornu local,...).

    2. Reparte’l trabayu col compañeru del grupu, habréis de negociar lo que va facer caún, lo que vais facer xuntos, l’enfoque que-y vais dar al trabayu, la organización de la información, les partes que va a tener.

A) PRESENTACIÓN DEL TRABAYU:

    • El trabayu tien que facese en folios blancos escritos a mano, nun fai falta que tea escritu cola mesma lletra, podéis repartivos el llabor d’escribir la versión final.

    • Hai que respetar tolos márxenes y sangríes.

    • Tien que tener una portada qu’incluya la siguiente información: títulu del trabayu, nome y apellíos de los autores, fecha, imaxen o dibuxu relacionáu col conteníu del trabayu.

    • Tien que tener un índiz qu’indique los apartaos qu’apaecen nel trabayu y el númberu de páxina nel que tán.

    • La portada y l’índiz nun se numberen, pero se tienen en cuenta a la hora de paxinar el trabayu.

    • Mui importante: ¡BIBLIOGRAFÍA! Tien que ser la penúltima fueya del trabayu y nella tienen qu’apaecer toles fuentes consultaes na elaboración del trabayu: llibros, apuntes, revistes, páxines d’internet,...

    • La última fueya será un foliu en blanco.

B) ESPOSICIÓN DEL TRABAYU:

    • Vas falar delante del grupu de clase, ye dicir, delante de xente que conoces bien, polo tanto, piensa en qué-yos pue interesar, qué-yos prestaría oyer, anque tomes la información de diverses fuentes, procura adaptala al públicu que te va escuchar.

    • Fai un guión pa nun perdete. El guión nun se llee, sirve d’apoyu por si los nervios te xueguen una mala pasada y olvides nel momentu el puntu del que tienes que falar darréu. Ye un apoyu, pue echase una güeyadina al guión pa comprobar que seguimos l’orden na esposición y que nun nos tamos saltando nenguna parte importante. El guión, simplemente, recueye los puntos más importantes de los que quies falar, nun ye una chuleta. Nun t’escuendas tras d’él, hai que mirar tamién pal públicu, y si el públicu te pon nerviosu o te distrae, busca un puntu pa onde mirar y nun perder la concentración (un percheru, una ventana, la paré...) Lo ideal ye mirar a les persones que te tán escuchando, pero poco a poco...

    • Nun hai qu’aburrir ni cansar al públicu con datos y coses que yá saben o que yá fueron diches, ye preferible buscar datos que despierten la so curiosidá y el so interés, pa que s’enganchen a la esposición y resulte más amena y entretenida pa toos.

    • El tonu claru, que se t’entienda, nun hai que falar al altu la lleva ni como si tuviéremos en misa, un términu mediu. Y nun olvides qu’hai que respirar, pa tar relaxáu y asina falar y comunicar meyor.

    • La esposición, al igual que la elaboración del trabayu, tien que ser una xera compensada y compartida. La intervención de los dos integrantes del grupu tendrá aprosimadamente la mesma duración.

    • Al final habrá un turnu d’entrugues p’aclarar dudes de los compañeros al rodiu de la vuesa esposición.

    • Pa rematar, habréis de facer una autoevaluación na que reflexonéis sobre la vuesa esposición oral.

    • Tamién ye importante la opinión del públicu, y asina, los compañeros tamién vos van a evaluar, valorarán les vueses intervenciones y los sos comentarios van ayudavos a dir meyorando la vuesa técnica de falar en públicu día a a día.