Costumbres, tradición, gastronomía, trabajos rurales, vida vaqueira, saber popular

L'home de piedra

Llorienzu Novo Mier 
“Cuentos y lleendes”
Editorial Trabe

Más leyendas lenenses,
publicadas en el libro:
Por los pueblos de Lena,
Ayuntamiento, Hifer, 2014
(pp. 548-559).
Xulio Concepción Suárez.

Xunto  Campumanes, nel camín que va de Teyeo a Rospaso, vese un peñatu ergutu, que semeya quixere algamar el cielu. La so color ye añegratada y estrémase ente les piedres blanques que lu roldien. Mesmamente averada a elli hay una peña, que ye tal un home esguilando. Les xentes de la rodalada, si se-yos entruga, dan en dicir que ye´l cuerpu de Bernaldu, que ta ellí, trocáu en piedra, pa exemplu y escurmu de los homes de güei y de mañana.

Peles tales aldegues diránvos quién yera Bernaldu, pero nadie algamará a saber el día que dexó la so casa na compaña del so hermanu Antón, pos la so ma, viuda de facía tiempu y probe, unviólos al monte, pa que sirvieren a un pastor que tenía´l so cabanón y una bona cabanada.

Bernaldu yera bragáu y arrechu; los sos güeyos espeyaben una lluz escura y el so coral, escosu de bondosidaes, yera más duru que la mesma piedra. El otru, Antón, pela contra, blanquín y maciu, de cálter bondosu, prontu a condolese de les llaceries de los sos semeyos.

Los dos rapazos dexaron la casa un día qu´amagaba tronada. Delantre diba Bernaldu, aína´l pasu y apináu d´un xeniu endegorriáu. Tres d´elli, Antón, atristayáu y doliosu por dexar sola a la so ma, y frayáu del camín, que yera pindiu y intriable. Metanto esguilaben monte arriba, el cielu foi ciarrándose más y más, tornándose menaciador.

Entós Antón díxo-y al so hermanu que podían abeyase pa tornar al camín ansina qu´albanciare, pos el bastiáu diba cayer abondo y fuerte. Pero Bernaldu, ensín dexar désguilar, arrepostió-y que yera tarde y que nun dexare de dir tres d´elli, si nun quería que lu dexare solu.

Ansina qu´algamaron pa riba de ríu Güerna, cuyes agües atorbonaes yeran la meyor muestra que la tronada yá taba enriba los picaños, hubieron de faer altu, y como, por otru llau, la nueche taba esbariando yá pel cielu, nun-yos quedó otru remediu quá abeyase nuna cueva, qu´atoparon a la vera del carreru per u diben. Nun fixeron más qu´abellugase cuando españó´l primeru de los truenos, riesgáronse les ñubes y l´agua escomencipió a baxar a barcalaes, faciendo un argüellu que nun dexaba oyer otra cosa.

Antón sacó d´ente la camisa una medallina de la Virxen, besóla y rodióse nel tarrén, poniéndose a riezar. Bernaldu, gargayándose del so hermanu, sentóse nuna piedra, sacó del burxazu tocín y un cachu pan y pún xose a mazcar ensin alteriase pola tronada que ruxía fora, nin pol agua que bastiaba ensin acabancia.

Y entós, mesmamente, coló na cueva una rapaza. Trayía tos vistíu moyáu,  y aburuyáu ente los sos brazos un neñín roxu y blancu,  que señeyaba un anxelín de Dios. Con voz doliosa pidió-yos un migayín de pan pal so fíu, que taba esgalazáu, el probetín, pos fixere dos díes que nun comiere. Bernaldu, ensín allevantar los güeyos, siguió mazcando a papu llenu, pero Antón condolíu, saco´l so pan del burxazu y dio-yos a dambos un cachu. Dempués quitóse la chaqueta pa que la rapaza pudieres arropellar al neñu que taba tou moyáu y aterecíu.

Al alborecer, la tronada fórase pa otros llugares y el primer rayu de sol allumó tol ámbetu y los páxaros golgotiaron nes cañes de los árboles, gullendo apinaos de vida. Albanciare dafechu y nun se vía una ñube en tol cielu, que yera azul, mui azul, como exlariáu pol agua que tuviera cayendo pela nueche.

Diben dexar la cueva, cuando al sortir fuera allegóse-yos un ruxíu qu´asobía del calce del ríu. Asomáronse a mira y Antón quedó xeláu. Embaxo, el Güerna baxaba foscu y ruxente, arramplando con tolo qu´atopaba per delantre, cañes y cabornos, xigues y dalgún animal afogáu. Yera como la mesma mar, con cachones que s´esfrellaben na riba, allevantando ñubes d´espluma.

Antón y la rapza rodiáronse, pa pidi-y al Dios del Cielu los sacare con bien, mentres que Bernaldu, riyéndose de la medrana de dambos, arrincó la chaqueta, dimpuestu a allanciase al agua. Nun valió qu´Antón quixere agarcialu pa que nun fixere llocada tal. Pero Bernaldu, d´un embutión, cholu pa un llau, desagarrándose, y foi haza´l ríu.

-¡Torna, hermanu!-dicía-y Antón- Mira que´l ríu abaxa fosqueru, que carreta muncha agua y vas afogate. ¡Nun me dexes solu, Bernaldu!

Pero nun valieron los ais d´Antón, nin les llárimes y sópliques de la neña. Testerón, ensin faer casu de les encamentaciones del so hermanu, nin de les llárimes de la rapaza, Bernaldu algamó la riba del ríu, dio un blincu y allancióse metanes l´agua, nalando con bravén fasta que les sos manes apalparon una peña que s´allevantaba al otru llau del calce. Y púnxose a esguilar per ella.

Pero entós asocedió dalgo que fexo que´l so bravén s´esfreciere de sópitu. Ansina que diba esguilando pela peña, los sos brazos, les sos piernes y tol so cuerpu diben llancándose- y na piedra. Quería asobir más y más y nun podía. Nun yera a dar un pasu más. Esfolguexaba pa faer tola fuercia y l´alientu diba dexándolu, mentres el so coral baltiaba doliosamente adientro´l pechu. Quiso glayar, xurar. Los didos nun yeren a  agarciase nos regallos de la peña. Entós sintió mieu y pensó nel su hermanu Antón, pa llamalu. Pero´l gritu, la llamada, afogóse- y na gargantia.

Entamó desagarrase de la peña y nun pudo desapegase d´ella. Un fríu de xelu escomencipió a adurmi-y les piernes, que- y diben quedando dures como la mesma piedra. Y como nun yera a glayar, allanciaba bocayaes col so pensamientu, barbollaba xuramentos, ensín alcordase ensiquier de Dios y soplica- y que-y chara una mano, p´axudalu.

Metanto Bernaldu diba llancándose na piedra, faciéndose piedra, na otra riba, Antón, que fora galguiando tres el so hermanu, atopóse metanes l´agua, qu´asobía y asobía, algamándo-y cuasi la boca.

-¡Dios míu!- dixo, viéndose morrer afogáu-. ¡Fai que nun m´afuegue, Dios!¡ He dir salvar al mio hermanu! ¡Nun quiero morrer!

Tal que si quixere ser la postrera, el probe Antón cho una güeyada a la rapaza y al neñu, que taben averaos más arriba, como pa dispidise d´ellos. Atopólos ellí, pero les carines de fame ya nun yeren ta y dambos rellumaben lo mesmo que´l sol, arrodiaos d´un arniu esplandiente.

De sópitu, el ruxíu del agua samecióse, acallantándose y el ríu escomencipió a baxar pacetiblemente, dexándolu na oriella, ensuchu y vivu. Entós, Antón allevantó los güeyos pa da-yos les gracies a la rapaza y al neñu y nun foi a afayalos per dengún llau. Y Bernaldu, que siempre tuviere´l so coral fechu de piedra y la so ánima rabalba al arrepentimientu, tará per de siempre llancáu na peña, fechu piedra, nel camín que va de Teyeo a Rospaso, na riba del ríu Güerna.

Ver la Leyenda La Cueva Gancios

Ver El Pozu las Muyeres Muertas

Volver a Costumbres vaqueras

Otras leyendas asturianas

Para otras obras de
Xulio Concepción Suárez,
Ver Bibliografía

Volver a Índice alfabético de contenidos

.