Costumbres, tradición, gastronomía, trabajos rurales, vida vaqueira, saber popular
por Xulio Concepción Suárez


Nacho Fonseca

Andolina

Andolina qu'al dite,
pela seronda,
dexes mudu l'aleru
de la casona
nun t'escaezcas
de tornar cuandu torne
la primavera.

Paxarina qu'entames
dexar el ñeru
pa xugar coles ñubes
cerquina'l cielu
los anxelinos
van naguar col to vuelu
los probiquinos.

Cuandu, lexana, teas
n'otros llugares
y sientas otres fales
y otros cantares
has d'alcordate
qu'esperen les flores
pa festexate.

La ñevada

"Vino'l vientu'l norte
qu'anunciaren pela tele
y unes ñubes prietes
fartucáronse a achar ñeve

y nun se ve un prau
que nun tea ñevau
y pesllaren les escueles

nun ye too estudiar
güei toca xugar
y arrollicase na ñeve.

Va dos díes que ñeva
y nun xube'l panaeru
y a coyer la lleche
tampocu vien el llecheru

y nun se ve un prau
que nun té ñeváu
y pesllaren les escueles

nun ye too estudiar
güei toca xugar
y arrollicase na ñeve"

La xaronca

La xaronca al pie la fonte
entamando ta a canciar
croa, croa, croa
¿qué diz la xaronca?
croa, croa, croa
¿qué mos cuntará?

Ta mirando pa la lluna
ente unos xuncos sentá
croa, croa, croa
¿qué diz la xaronca?
croa, croa, croa
¿qué mos cuntará?

Volver a
ÍNDICE alfabético de materias